News

Crackers - mier send halt vo de ältere Garde - drom send d'Handy's ned emmer "schossbereit"...

...so hemmers for luuter schwelge ond schwätze vo de alte Coco-Ziite verschwetzt, es Föteli
vo üüs z'schiesse - aber die wo debii gsii sind, wössed jo (hoffentli) no wis uusgseeh hed... ;-)

För alli andere mues halt das Prechtli do lange för die "geischtigi Visualisierig"...

Z'erscht mol velle Dank em Herr Dokter Fallebach förs organisiere vo dem glongne Oobe i de Änte!

Träffponkt esch for de Änte gsii, mier send denn aber glii ine go warte - bis üsi reservierte Tisch frei worde sind.

E chliini aber knackigi Fasnachts-Charte hed de Honger schnell nochli lo grösser wärde - aber d'Chochi esch quick onderwägs gsii ond scho bald hemmer üses bschtelle Ässe chönne gnüüse.

Üsi "Servieri" esch ganz e uufgschtellti Nuudle gsii - do esch so mänge Sproch gfalle (gägesiitig natüürli) ond me esch sich nüüd "scholdig blobe" - so rechtig fasnachtig halt!

Noch so mängere Anekdoote vo früener hemmer gseit, mer mached no en gmeinsami Rondi dör d'Statt - au de Stibe hed gseit är chond met...  Wer de Stibe könnt, weiss wi "französisch" in perfektion good. Do semmer also dosse am warte bis alli parad send - alli, bis uf de Stibe halt. Au e zuesätzlichi Suech-Rondi dör d'Änte inklusive WC hed de Stibe nömme "vörebroocht" = Stibe uf französisch +1 (das Resultat wet ouä niemmer wösse...)

Tia, de semmer halt ohni "Franzos" dör d'Statt zoge - di einte chli länger, di andere send chli früener "för de Frede" gsii. Es paar Bierli ond/oder Kafi spööter send de au di letschte Crackers de verdienti Erholigsschloof för de kommendi Tsiischtig go in Aagriff nääh...

En schööni Vorfasnacht bes am 8. Februar 2024 (wenns de äntli weder loosgood...)

wönscht de Schlompf